القلب يحزن

السلام عليكم

هذي انشوده كتبها منشد لأمه المتوفاه الله يرحمها

القلب يحزن والمدامـع غزيـرة
وفي جوفي نارٍ من لهبها تباكيـت

والدار ظلمة كانـت أمـي تنيـره
يايمه وينك من دونك خلى البيـت

قلبي تفطّر على الفرقـا المريـرة
آمنـت بالله وبأقـداره تراضـيـت

الموت حقٍ وكلـن لـه مصيـره
وبموت النبي قبلك يايمـه تعزيـت

هذا جِلالك وريحـك فـي عبيـره
كل يوم اشمه وليـا شفتـه تهنيـت

صوتـك يايمـه يامحلـى أثيـره
وحنانـك يمـه يخلنـي تفديـت

من يوم رحتي والمشاعـر أسيـرة
محدٍ أفضفض له وبصَمتي تسجّـيت

يايمـه من هو أجـي واستشـيـره
يعدّلني لي شفت الصواب وتنحيـت

يايمـه كلـن يناظـرني فـي حيـرة
من يوم رحتي وأنا الّي ما تواسيت

أجي دويـخ فـي وقـت الظهيـرة
محدٍ سأل عنـي يقـولي تغديـت

وأبيـت ليلـي وعيونـي سهيـرة
وكـم الليالـي نايـم ماتعشـيـت

ظروفٍ يمـه تواجهنـي عسيـرة
الشكـوى لله بظروفـي تعنـيـت

يوم كنتي عندي وكني أمير ديـرة
كلن يناديني ويقولي تعال هيـت

ويوم رحتي يمه وكني في جزيـرة
وحيدٍ فيها عن النـاس تواريـت

ياكم تعلمت مـن معانـي غزيـرة
يامَنهـل التعليـم منـّك تربـيـت

كم قصة قلـت وللماضيـن سيـرة
ولي جيت عندك بسواليف تسلّيـت

آآه يايمـه لنظـراتـي الأخـيـرة
مليـت كفـي ترابٍ ثـم حثيـت

ابشـري يمـه بدعـواتٍ كثيـرة
كلما ذكرتـك وللرحمـن صليـت

وشــــــــــكـــــــرا ...

قصيدة محزنة ومؤثرة تتحدث عن اصعب فراق اعز الناس "الأم"

اجبر الله عزاءه

وفعلا الانشودة تؤثر اكثر بصوت المنشد انا كم مرة سمعتها

مشكور اخوي على هيك ابيات

يعطيك العافيه أبو مشعل

والله ما فيه أصعب من هذا الفراق

ولاكن المؤمن الذي يتلقى الصدمه بقبول بالقدر

نستنا جديدكم يالمبدع

من السهل على الانسان ان يحب

ولكن من الصعب عليه ان يفارق من يحب

اما فراق الوالده

فذلك هو الفراق الذي لايذهب

اثره من ذاكرة الانسان

قصيده جميله وكاتبها مبدع في الاختيار

مشكور اخوي وتقبل مروري